|
#294
8th July 2011
|
||||
|
||||
|
vikas apne bed par let kar bas nidhi ke hi baare mein soch raha tha. wo jitna uske baare mein sochta jaa raha tha, utna hi wo usse apne se door hoti jaa rahi thi. bas kal raat tak ka time thha uske paas. uske baad shayad nidhi ko kabhi nahi dekh payega. ek ladki jisko wo itne saal tak chahta raha, jisko paane ka sapna pehle usne dekhne ki bhi nahi sochi thhi, aaj wo itni paas aakar usse door ho gayi thhi. Usko paane ke jo armaan usne piroye thhe, aaj un sab pe paani fir gaya tha. lekin iska dosh wo apne upar kaise le sakta hai? usne to bilkul sach bola tha. sab kuch sach. zindagi mein pehli baar shayad usne itni sachhai se koi baat kisi se kari thhi, lekin yeh saala prem .. time pe dhokha de gaya. jiss prem ke liye usne apni jaan jokhim mein daali, jis prem ki baatein usne din raat suni, jis prem ka wo eklauta aasra bana, aaj ussi ne usko ghodi bana diya.
"prem.. kahan ho tum.. main jaanta hoon yahin kahin chup ke baithe ho. niklo bahar. baat karo mujhse. kyun.. kyun kiya yeh sab mere saath tumne" ab vikas ka gussa charam seema pe thha .. wo apne aape se bahar tha. aankhein ekdum soorkh laal. jaise khoon utar aaya ho. lekin prem to kahin dhoondhne par bhi nahi milta usko. gusse mein wo flat se bahar nikal gaya aur chal pada apne purane adde ki taraf. jaise jaise wo bar ki taraf badh raha tha, wo jaanta thha ke wo ussi zindagi ko waapas apnane jaa raha hai jisko accident ke baad chhod diya tha. wo jaanta tha ke ek baar usne iss aadat ko waapas apna liya to uski zindagi tabah ho sakti hai. ho sakta hai abki baar usse bachane koi prem ya nidhi na aaye. lekin iss waqt uske mann mein itni khudas aur gussa tha ke wo anjaam ki parwah kiye bagair fir daaru ke nashe mein ghulne ko tayyaar ho gaya. http://youtu.be/M0deNQdSXHk Raat ko kisi tarah se ladkhadate hue usne apne flat ka darwaaza khola, aur andar aa kar dhamm se gir gaya bistar par. neend uski aankhon se koso door thhi. dimaag tivra gati se chakkar kha raha tha. bistar par lete hue bhi usko aisa lag raha tha jaise kisi bawandar mein fasa hua hai. usko kuch samajh mein nahi aa raha tha ke kya chal raha hai. reh reh kar nidhi ki yaadein kaundhti thhi dimag mein. kabhi wo has rahi hoti thhi, kabhi ro rahi hoti thhi, kabhi bas yun hi usse dekh rahi hoti thhi to kabhi chaata mar rahi hoti thhi. Vikas ka dimag theek hone ki bajaye aur kharab hota jaa raha tha. usne decide kar liya ke abhi jayega aur saari baatein nidhi se clear kar lega. wo bistar se uthne ki koshish karne laga par aisi haalat mein woh uth nahi paa raha tha. kisi tarah se girte padte usne apne room ki batti jalayi. saamne hi prem baitha tha. usko dekhkar aur gussa aaya vikas ko aur wo usko maarne ke liye uski taraf badha "saale. ehsaan faramosh. yeh sila diya tune mujhe. kamine... kyun aaya hai ab yahan. bhaag ja yahan se. koi madat nahi karne waala teri main" "haalat dekhi hai tune apni? kisi madat ki umeed bhi nahi hai mujhe tere se. " "bata kyun diya itna bada dhokha tune mujhe... kyun sahi time pe mere saath nahi raha" "tumhein sharam aani chahiye yeh bolte hue vikas. apni haalat ko to dekho. tumhein lagta hai ke kabhi nidhi ko khush rakh paate tum?" "main usse bahut pyaar karta tha, karta hoon aur karta rahunga. tum kaun hote ho mujhe tokne waale. mujh se gidgidaate hue to tumhein main bahut achcha lag raha tha. ab kaam nahi bana to mujhe khari khoti sunaoge" "abey chod tu in baaton ko. rahul tujhse har maamle mein achcha hai. wo nidhi ko bahut khush rakh sakta hai. main bahut khush hoon ke nidhi uske saath jaa rahi hai aur tumhaare saath nahi hai." "haan haan manao khushiyan. dekhta hoon kitne din khush rehte ho. aakhir mein waapas to mere paas hi aaoge na. rahul ke through message thode bhijwa sakte ho" "tumhein pata hai ke tum kitne ghatiya, selfish aur chotti soch waale insaan ho?? aisa aadmi mere roop mein ek baar nidhi ki zindagi mein aa chuka hai, aur main nahi chahta ke meri wajah se waapas uski zindagi mein aaye. kehte hain ke apne sabhi paapon ka prayshchit insaan ko yahin karna hota hai. main samajh lunga ke ek bhoot banke is dharti pe rehna hi meri behavior ka prayshit tha. aur main bahut khush rahunga yeh jaan ke ki tum uski zindagi barbaad nahi kar rahe meri wajah se" "nikal jaa yahan se saale. ehsaan faramosh. kutte. shakkal bhi nahin dekhni mujhe teri. saale peeth pe waar kiya hai tune. sadta reh ab dharti par. dekhte hain kaun poochta hai tujhe" gusse mein vikas thoda aage badha to nashe mein ladkhada kar gir gaya aur so gaya. vikas ko aise behosh pade dekh prem ko bhi bahut gussa aa raha tha. wo reh reh ke soch raha tha ke kyun bhagwaan ne uska paala aise ghatiya aadmi se baandha, jo doosron ki fikar to door, apna khayal bhi theek se nahi rakh paata hai. Upar se usko reh reh ke wo photu ki yaad aati thhi jo uss din vikas nidhi se chupa raha tha. prem ne dekh liya tha ke vikas aur nidhi photo mein ek saath hai aur usko maamla samajhne mein der nahi lagi thhi. wo jaan gaya tha ke vikas uska sahara le kar sirf nidhi ke karib aana chahta hai aur uski help karna ka koi intention nahi rakhta. Usne tabhi mann bana liya tha ke wo vikas jaise galeech aadmi ko nidhi se kabhi sambandh nahi rakhne dega. Aur isi liye aaj usne vikas ko jhoothe naam bata diye thhe. andar hi andar wo bahut khush tha ke vikas aur nidhi ki dosti toot gayi hai, lekin apni haalat pe usko aur bhi daya aa rahi thhi. lekin yeh soch ke ki jis bhagwaan ne usko vikas se milwaya hai, wo kisi aur se bhi milwa dega, prem wahan se chala gaya. Vikas ki neend seedha jaa kar dopahar ko hi khuli. ghadi mein ek bajne ko tha aur usko zabardast hangover ho raha tha. wo jaa ke nahaya dhoya aur laga apna lunch banane. saath mein wo yeh bhi soche jaa raha tha ke ab wo aage kya kare. uska dil yeh maan-ne ko tayaar hi nahi tha ke nidhi se uska saath choot gaya hai. usne poori dopahar bas yeh sochne mein guzaar di ke kaise jaake nidhi se baat cheet waapas start kare lekin koi upay nahi nikla. shaam tak koi upay na nikalne se usne socha ke chalo aise hi jaa ke ek baar mil lete hain nidhi se, aur kuch nahi to kam se kam see off hi kar denge. aisa soch kar wo nidhi ke flat ki taraf chal pada. Wahan pahuncha to usne dekha ke darwaaza thoda sa khula hua hai. usne 2 baar ghanti bajayi lekin koi aaya nahin. kuch soch kar wo ghar ke andar ghus gaya. andar ghar ki halat kharab thhi. saara samaan bikhra pada tha. vikas ko laga jaise chori hui hai ghar mein aur uska dil zor zor se dhadakne lag gaya. usne socha ke waapas jaa kar police ko khabar karega. jaise hi wo peeche muda ek ghusaa uske muh pe aa ke laga aur chaaro taraf andhera chaa gaya. jab uski aankh khuli to usko sab dhundhla dhundhla dikhayi de raha tha... dheere dheere wo adjust hua to paya nidhi ke flat mein hi hai. usne apne haath uthaane chaahe to paya ke uske haath aur pair kursi se bandhe hain. "koi hai" wo zor se chillaya "kya chal raha hai yahan? mujhe kholo" :aa gaya hosh tujhko miyan.. kab se teri awaaz sunne ko kaan taras rahe thhe" ek lamba chauda aadmi uske paas aa kar bola "kaun ho tum" vikas thoda darr raha tha "abe kya karega jaan ke hamaari tareef?? teri chammak challo kahan hai?" "kiss ki baat kar rahe ho?" "jiske ghar mein tu hai shaane.. zyaada hoshiyar mat ban nahin to gaand mein goli maar dunga. ek mahine tak hag nahi payega.." "kya chahte ho tum" "tujhe to nahi chahta. bata de nidhi kahan gayi hai aur nikal le apni jaan hath mein le ke.. warna murde se pata nikalwaunga" "mujhe sach mein nahi pata ke wo kahan hai" "abe hoshiyaari chaatni band kar aur jaldi bata ke wo kahan hai warna yeh bandook dekhi hai, usko itna andar ghusa ke chalaunga ke internal beleeding se hi mar jayega" "arrey band kar apni bakwaas. bahut ho gaya. agar mujhe pata hota ke wo yahan nahi hai to main kya jhaadu maarne aata iss samay yahan. bahut bak raha hai tu. hai kaun" jaan ka thikaana nahi tha, fir bhi uski akkad nahi gayi thhi "teri darling ne paise chukaane hai humaare... 50 lakh.... aaj dene thhe usko, pata nahin kahan bhaag gayi hai" tabhi uss aadmi ka phone baj uthav"hello... haan shekhawat sahab... kya baat kar rahe ho... 50 laakh chori kar liye... koi photu wagerah hai kya launde ka.... haan nikalwa lo, main kal aake photu leta hoon. fir dekhta hoon ke kya kiya jaye uska" kehkar usne phone kaat diya. "munna .. o munna. kahan chupa hai be... suna tune.. kisi ne shekhar sahab ke ladke ke account se 50 lakh rs chura liye hain. saala aajkal choron ke ghar bhi chori hone lagi hain... kal jaa ke unse wo launde ka photu le lena... bank ke camere se nikalwaane gaye hain wo... dekhta hoon kiski itni himmat aa gayi ke ismail bhai ke area mein chori karne laga" usne apne saathi se bola Vikaas ko o ab jaise kaato to khoon nahi. na kewal nidhi paise le kar laapata ho gayi thhi, balki usski chori bhi pakdi gayi thi. kya hoga uska ab... kaise bachayega apni zindagi in khooniyon se.. kya yehi uski zindagi ka ant hai... ya uski kismat mein kuch aur likha hai... Last edited by Sarhad : 9th July 2011 at 12:34 AM. 
|
|
| Thread Tools | Search this Thread |
|
|
|
All times are GMT +5.5. The time now is 01:49 PM. |
